HELDER is ‘n splinternuwe musiekblyspel gebaseer op die verhaal van Josef in die Bybel. Met musiek en ‘n aangrypende verhaal trek Gropp en Van der Westhuizen die gehoor in die wêreld van straatbendes, weeskinders en weldoeners in. Die produksie spog met gesoute spelers, Anna Davel en Pierre Breytenbach asook jong talent en top musikante. HELDER laat jou nadink oor die betekenis van die waarheid, die maskers wat ons dikwels dra en die vryheid wat onthulling bring.
22 Aug 19:30 | 23 Aug 15:30 & 20:00 | 24 Aug 15:30 & 20:00
NG Tygerpoort Kerkgebou
Kom eet, drink en kuier voor en na die vertonings in die enRoute Cafe!
Die eeue-oue storie in ‘n nuwe fantasiewêreld
Die storie, losweg gebaseer op die Josef-verhaal in die Bybel, het ‘n hedendaagse idioom wat afspeel in ‘n “nuwe wêreld”.
‘n Straatkind in Lumina is vasgevang in ‘n desperate situasie. Sy gawe om tussen waarheid en leuen te kan onderskei, word deur sy meester misbruik. ‘n Mespuntsituasie dwing hom om ‘n keuse te maak. Hy ontsnap uit sy huidige omstandighede deur ‘n dubbele lewe te lei. ‘n Nuwe weldoener gebruik die kind se gawe om reg en geregtigheid te laat geskied. Wanneer sy straatvriende hulp nodig het, word sy nuwe lewe met die oue gekonfronteer. Noodgedwonge word sy ware identiteit onthul. Sy eie leuen word uiteindelik deur die waarheid verhelder met verrykende gevolge.
Die nuwe wêreld van Lumina
Die produksie speel af in ‘n fantasiestad van lig – Lumina. Die stad bestaan uit distrikte, areas, strate, plekke en monumente. In die Niemandskant en Suidekant funksioneer straatkinders in verskillende bendes. In die Noordekant woon die leiers van die stad. Lumina is ‘n stad vol hoop en potensiaal en beskik oor kleurvolle karakters en intriges.
Indien daar nog sitplekke beskikbaar is, sal kaartjies by die deure verkoop word.
‘n Volledige album word vervaardig met die musiek uit Helder – die musiekblyspel. Die musiek is van so aard dat dit buiten die konteks van die blyspel ook genotvol sal wees.
Dit beloof om ‘n wonderlike album te wees, met name soos Anna Davel, Pierre Breytenbach, CJ van Aarde, Wouter van Wyk, Christa Schutte en Christine Geertsema.
‘n Fantastiese kinderkoor wat saamsing, maak die album ook ‘n moet vir jou versameling.
Al die liedere op die album is geskryf deur Zander van der Westhuizen en Leon Gropp, en word vervaardig deur Jattie de Beer.
(Geskryf deur Leon Gropp & Zander vd Westhuizen | Gesing deur Anna Davel, C.J. van Aarde, Pierre Breytenbach, Leon Gropp, Christa Schutte, Christine Geertsema, Wouter van Wyk en die kinders van die Helder produksie | Vervaardig deur Jattie de Beer)
Na die suksesse van vorige produksies soos Emmaus, Invloed, Tjello en Wolkedans skep Zander van der Westhuizen en Leon Gropp hul grootste produksie nog. Saam met ‘n produksiespan van formaat word die musiek, die stel, die beligting en die klank op professionele standaard aangepak.
Zander van der Westhuizen
Zander van der Westhuizen skryf sedert sy studentejare verhoogstukke en musiek. Hy het ‘n ATKV Liertoekenning ontvang vir nuutgeskrewe komposisie van die jaar sowel as ‘n SAMA toekenning as lid van die groep Vertikaal. Zander het in die verlede verskeie produksies vervaardig, onder andere ook in die korporatiewe
wêreld.
Leon Gropp
Leon Gropp is ’n sanger / liedjieskrywer / kitaarspeler van Pretoria. Hy is sedert 2005 professioneel in die musiekbedryf en was deel van en is betrokke by verskeie musiekgroepe en produksies. Hy was vir tien jaar deel van die bekende kitaarduo, CH2 en het in die tyd verskeie toekennings ontvang, insluitende SAMA en Ghoema toekennings. Sy solo debuutalbum Rooidag sien die lig in 2017 en ’n gelyknamige verhoogproduksie wen die Woordtrofee in 2018 by die US Woordfees vir “Beste Musiekgedrewe produksie”. Sedert 2018 is hy mede-aanbieder van die program “Ontbytsake” op die Kyknet kanaal.
C.J. van Aarde (Joe “Judge” de Jongh)
C.J. sing sedert hy agt jaar oud was. Hy het drie opeenvolgende jare aan Eisteddfods deelgeneem en o.a. hoogste lof behaal vir die onderskeie liedjies wat hy gesing het. In 2016 het hy aan die Gemini-sangkompetisie deelgeneem en eerste gekom in sy ouderdomsgroep in die kategorie vir kontemporêre liedjies. In 2017 het hy aan die Search for a Star kompetisie deelgeneem en tweede geëindig in sy ouderdomsgroep. In 2018 het hy aan Talent Africa in PE deelgeneem en die toekenning vir Best Junior Entertainer ontvang. Hy word as een van die top tien junior sangers benoem en kwalifiseer daarmee om die SA-span by Talent America in New York te verteenwoordig.
Anna Davel (Regter Marelize Strydom)
Anna Davel is ‘n Afrikaanse liedjieskrywer, sangeres en aktrise van formaat. Sy is in 1997 deur die ATKV as wenner van die Crescendo-sangkompetisie aangewys. Sy was vanaf 1997 tot 2003 deel van die gewilde vroulike aCapella-groep Cutt Glass. In hierdie tydperk het die groep drie albums vrygestel en binnelands sowel as oorsee gehore aan hulle voete gehad. Sedert 2003 het Anna reeds agt solo-albums uitgebring waarvan haar solo debuutalbum in 2006 ‘n SAMA vir Beste Volwasse Kontemporêre Album ontvang het. In 2008 is sy as een van slegs vyf ander top Suid-Afrikaanse sangers benoem as Beste Vroulike Sanger. Van haar treffers sluit in: Die Gypsy in
jou oë en Te lank al.
Pierre Breytenbach (Groenbaard de Beer)
Pierre Breytenbach is ‘n gesoute verhoogkunstenaar wat reeds in verskeie verhoogproduksies soos Hond se gedagte, Caspernades en Grootseun (om net ‘n paar te noem) gespeel het. Hy is bekend vir sy televisiewerk in onder andere reekse soos Getroud met Rugby, Proesstraat, Dagbreek, Casper Rasper Show en 50/50. Pierre doen gereeld advertensiewerk en tree dikwels as kunstenaar en seriemoniemeester by funksies op. Pierre het al meer as een SAFTA toekenning ontvang.
Christine Geertsema (Madelein Strydom)
Christine Geertsema is ‘n Gr10-leerder aan die Hoërskool Waterkloof. Sy neem al van kleins af aan sang-, dans- en drama-aktiwiteite deel. Sy wen gereeld verskeie Kunswedstrydafdelings, was onder die topwenners van die SA Kids with Talent-kompetisie en het al verskeie hoofrolle in Atterbury kinderteaterproduksies vertolk. Sy het ook in “Emmaus – die musiekblyspel” ‘n rol vertolk . Christine se ander belangstellings sluit deelname in debattering, redenaars, hokkie en atletiek in.
Wouter van Wyk (Kaptein Bloubaadjie)
Wouter van Wyk is predikant van NG Tygerpoort. As sanger is hy gereeld op die verhoog van Brooklyn Teater. Onder andere het hy al hoofrolle vertolk in operas soos Rossinni se Barbier van Seville, Verdi se La Traviata en Mozart se Towerfluit. Verder tree hy graag op by privaatfunksies waar die program uit ligte musiek bestaan.
Christa Schutte (Willemien de Winter)
Christa is ‘n jeugmentor en onderwyser met ‘n groot liefde vir musiek en teater. Sy het op universiteit begin om haar eie liedjies te skryf en te sing. Een van die liedjies is as liedjie van die jaar tydens die Free State Music Awards (in 2011) aangewys. Behalwe vir haar deelname aan verskeie musiekgeleenthede en projekte het sy In 2017 ‘n rol in die musiekblyspel, Invloed vertolk.
Die res van die spelers
Na 70 oudisies is die beste jong talent gekies as straatkinders vir die twee straatbendes in die produksie. In totaal is daar meer as 40 spelers op die verhoog.
